"ქართული მარშის“ განცხადებით, „პატრიოტთა ალიანსის“ წევრმა, ფრიდონ ინჯიამ დახმარებაზე უარი კალაძის კრიტიკის გამო უთხრა. სანდრო ბრეგაძის განცხადებით, მიუხედავად იმისა, რომ ინჯია ოპოზიციური პარტიიდან იყრის კენჭს, არჩევნებში მხარს მმართველ პარტიას უჭერს. „როდესაც ჩვენ მათთან მივედით დახმარებისთვის, მარშისთვის გვჭირდებოდა გარკვეული დახმარება. მან პირდაპირ განგვიცხადა, რომ თქვენ უპირისპირდებით სამთავრობო კანდიდატ კახა კალაძეს. აქედან გამომდინარე, ჩემგან დახმარება გამორიცხულია, რადგანაც მე ვარ კახა კალაძის მხარდამჭერი.“ - თქვა სანდრო ბრეგაძემ.
„ქართული მარში“ არჩევნებს ბოიკოტს უცხადებს და ბრეგაძის თქმით, ინჯიას ეს პოზიცია არის კიდევ ერთი თვალსაჩინო მაგალითი იმისა, თუ რატომ არის ბოიკოტი საჭირო. „არჩევნებში, რომელშიც ძირითადი ოპოზიციური ძალის სიის მეორე ნომერი მხარს უჭერს არა თავისი პარტიის ლიდერს, ირმა ინაშვილს, არამედ კახა კალაძეს, მე თქვენ გეკითხებით: - ამ არჩევნებს რაიმე აზრი აქვს? ეს არის დახლი, სადაც დგანან ვაჭრები. ბაზარია, „დეზერტირების ბაზარი“, სადაც მიმდინარეობს აღებ-მიცემობა, ვაჭრობა.“ - განაცხადა ბრეგაძემ.