მას შემდეგ, რაც ფედერალურმა სარეზერვო ბანკმა განაცხადა, რომ მზად არის წლის ბოლომდე კიდევ ერთხელ გაზარდოს საპროცენტო განაკვეთი, აშშ დოლარის ფასი მომენტალურად გაიზარდა.

როგორც ჯანეტ იელენმა განაცხადა, „აშშ ეკონომიკა საკმაოდ ძლიერია იმისთვის, რომ გაუძლოს საპროცენტო განაკვეთის სამომავლო ზრდას და 4,5 ტრილიონი დოლარის ბალანსის შემცირებას. მან ასევე აღნიშნა, რომ ქვეყანა გამოვიდა კრიზისული მდგომარეობიდან და ამ ეტაპზე ელოდებიან მხოლოდ იმ ფაქტორების გამყარებას, რომელმაც გამოიწვია ინფლაციის დონის ვარდნა და რომელიც მოითხოვს მონეტარული პოლიტიკის შეცვლას. შესაბამისად, FED-ის განცხადებით ოქტომბრის თვე დაიწყება აღნიშნული ბალანსის შემცირებით.

მართალია, პროგნოზისამებრ საპროცენტო განაკვეთი იგივე დარჩა, მაგრამ სიგნალმა მისი გაზრდის შესაძლებლობის შესახებ, ფინანსურ ბაზრებზე საკმაოდ დიდი მოძრაობა და ინვესტორების მიერ ვალუტის აქტიური შესყიდვა გამოიწვია. იელენის განცხადების ფონზე, აშშ დოლარის ფასი ყველა სხვა ვალუტებთან მიმართებაში გამყარდა, ხოლო ევროს დაახლოებით 130 პუნქტით ვარდნა გამოიწვია.