IPOVE.GE News

5 ძველი და ახალი ფილმი, რომელიც Netflix-ზე ამ შაბათ-კვირას უნდა ნახო!

17 მაისი 2019

ებისმიერი დასაქმებული ადამიანისთვის შაბათ-კვირა სწორედ ის პერიოდია, როცა განტვირთვისთვის თავისუფალი დრო აქვს და შეუძლია აკეთოს ის, რაც მოესურვება. შესაძლოა შენ ახლა Netflix-ზე იყო შესული და კარგი ფილმის აღმოჩენას ცდილობდე, მაგრამ არჩევანი იმდენად დიდია, რომ ვერ წყვეტდე, რომელი ერთით დაიწყო.

ჩვენ გირჩევთ ხუთ ძველ და ახალ ფილმს, რომელიც ამ უიქენდზე Netflix-ზე აუცილებლად უნდა ნახო.

 

1. The Highwaymen (2019)

 

ბონი და კლაიდის ისტორია ჯერ კიდევ პოპულარულია კინო სამყაროში. ამის დასტურია 2019 წელს გამოსული ფილმი The Highwaymen, რომელშიც დიდებული მსახიობები — კევინ კოსტნერი და ვუდი ჰარელსონი თამაშობენ. ფილმი რეალურ ფაქტებზე დაყრდნობითაა გადაღებული, მისი შინაარსი კი ასეთია: ორი ტეხასელი ყოფილი რეინჯერი პენსიიდან ბრუნდება, რათა ბონი და კლაიდის მიერ ჩადენილი დანაშაულებები გამოიძიონ. ფილმში ნახავ მძიმე და სახალისო სცენებს, თუმცა მთავარი ინტრიგა მაინც კვანძის გახსნაა, რომელიც აუცილებლად აღგაფრთოვანებს.

2. L.A. Confidential (1997)

 

თუ The Highwaymen-ის ყურება დაასრულე და კიდევ გინდა კრიმინალური დრამა ნახო, მაშინ ლოს-ანჯელესის საიდუმლოებებს უნდა ჩაუჯდე. 1997 წელს გამოსულმა ფილმმა კრიტიკოსებისა და მაყურებლების უდიდესი მოწონება დაიმსახურა, შედეგად კი ოსკარიც მიიღო. შენ გაქვს შესაძლებლობა ისეთი ვარსკვლავები, როგორებიც გაი პირსი, კიმ ბესინჯერი, დენი დევიტო და ჯეიმს კრომველი არიან, ერთ ფილმში იხილო. ფილმის შინაარსი კი ასეთია: სამი ერთმანეთისგან განსხვავებული დეტექტივი ცდილობს სხვადასხვა მეთოდებით გამოიძიოს ღამის სასადილოში მომხდარი მკვლელობების სერია. ამ პროცესში მათ უამრავი დაბრკოლება შეხვდებათ. ერთი სიტყვით, თუკი დეტექივები გიყვარს, ეს არის ფილმი, რომელსაც თვალს ვერ მოსყვეტ.

3. The Boy Who harnessed the wind (2019)

 

კრიმინალური დრამა უკან მოვიტოვოთ და ამჯერად სოციალურ დრამას მივაპყროთ ჩვენი ყურადღება და თვალი. ბიჭი, რომელმაც ქარი მოათვინიერა 13 წლის მალაველი მოზარდის ისტორიაა, რომელიც უკიდურესად ღარიბ სოფელში ცხოვრობს. შიმშილი და ყოველდღიური ბრძოლა გადარჩენისთვის ბიჭს მოტივაციას მისცემს, უჩვეულო გზებით გადაარჩინოს მისი ოჯახი და მთელი სოფელი ტრაგედიას. თუ როგორ მოახერხებს მიზნის მიღწევას, ამას ფილმიდან გაიგებთ. ეს ფილმი შეიძლება კარგი მოტივატორი აღმოჩნდეს ახალი სამუშაო კვირის დაწყების წინ.

4. To All The Boys I've Loved Before (2018)

 

თინეიჯერული მელოდრამის ყურება თუ მოგინდება, მაშინ არჩევანი ამ ფილმზე უნდა შეაჩერო. ეს არის კინო, რომელიც ასახავს ნებისმიერი მოზარდის ყველაზე საზარელი ფიქრების რეალობად ქცევას. წარმოიდგინე, რა მოხდება მაშინ, თუკი ყველა ბიჭი ან გოგო, რომელიც მოგწონდა, გაიგებს რას გრძნობდით მათ მიმართ?

ამ ფილმის ყურებას უიქენდზე ნამდვილად არ ინანებ.

5. Patch Adams (1998)

 

წარმოიდგინე, ისეთ სამყაროში რომ ცხოვრობდე, რომელშიც ნებისმიერ დაავადებას სიცილი კურნავს. კარგი იქნებოდა, არა? — მკურნალი ადამსი ფიქრობს, რომ ადამიანებს ნებისმიერი სენის დამარცხება მხოლოდ სიცილით შეუძლიათ, ამიტომ ყველაფერს აკეთებს თავისი პაციენტების გასართობად. ეს ფილმი შაბათ-კვირის დასასრულს უნდა ნახოთ, რადგან ის სევდისა და ბედნიერების განცდას ერთდროულად მოგგვრით. მითუმეტეს, რომ მასში მთავარ როლს ლეგენდარული რობინ უილიამსი ასრულებს.

მსგავსი სიახლეები